Dat stommt Leiden

Ech fannen et relativ traureg ze gesinn wéi eidel d’Spillplazen, an d’Stroossen am Allgeméngen sinn… Net nëmmen Kanner gesäit ee kéng méi, vu dass di meescht Kanner a Strukturen sinn, mä och aal Leit … Et schéngt mer heiansdo wéi wann nëmmen déi Leit, déi ganz ‘aktiv’ hiere Bäitrag zum globalen, wirtschaftlechen Wuesstum maan, eng Daseinsberechtegung an eiser Gesellschaft hätten. An deemno och eng Stëmm. As daat net e bessi traureg? Wéi kann een un Deenen spueren déi sech am mannsten selwer hellefen kennen? Si gin net gefrot. Oder ass daat Strategie?

An och d’Elteren, déi natierlech genausou ënnert der Trennung leiden, wann se hier Kanner stonnelaang net gesin, ginn normalerweis net gefrot! Op een an deem Fall an iergendenger Form vun Emanzipatioun schwätzen kann, ass ze bezweifelen…! Mä deen Terme gëtt nach ëmmer ganz gäre mëssbraucht fir virun allem de Fraen wäisszemaachen, dass se keng Daseinsberechtegung hätten wann se net schaffen, an dee Moment keng Kaafkraft hunn. Ween net schafft fir sech ëm seng Kanner ze këmmeren, dee soll opmannst e schlecht Gewëssen hun. Sech ëm Kanner këmmeren as jo keng Oarbescht, oder? (…)

Ech hunn d’Chance an engem Beruff ze schaffen wou ech meng Kanner nëmme stonneweis net gesinn. Mä net all Mensch huet di Chance. An ech fannen daat immens onfair, an och traureg deelweis mattzeerliewen, wéi schwéier di Trennung ville Kanner an Elteren fällt!
Fierwat net engem Elterendeel de Choix loossen? Bleiwen ech ganz doheem, oder ginn ech ganz schaffen, soll ech hallef schaffen? Di Fro kanns De Der nëmmen stellen wanns De di finanziell Mettel hues …

Wéi solle meng Kanner di éischt Liewensjoer erzunn gin? Waat se sollen iessen? A waat léieren? Eng politesch Ideologie déi den Elteren quasi virschreiwt, dass een seng Kanner soll friembetreien loossen, well d’Kand soss benodeelegt waer, grenzt e bessi un Entmündegung, oder?

Oft gëtt och dovu geschwat, dass et méi sozial gerecht fier jidfereen wär, wann d’Kanner schonn all ganz fréi an eng Institutioun géingen… Di sozial Ongerechtegkeet bleiwt trotz aller politescher ‘Méi’ bestoen, oder?
Ass et net esou, dass Zäit kascht, ‘time is money’ etc…?! Déi Leit déi sech et finanziell kënnen leeschten, méi Zäit mat hiere Kanner ze verbréngen, an daat och wëllen, déi maan daat. Si decidéieren an deem Senn, zum Beispill, hallef ze schaffen, oder se entscheedegen sech eng Auszäit ze huelen vir e puer Joer ganz vir hier Kanner do ze sin.

Mä waat vir ee Choix hunn dann sozial méi schwaach Leit, an hir Kanner? Ech schwätzen zum Beispill vun allengerzéienden Elteren. Fir si ass d’Aféierung vu gratis Kannerbetreiung net onbedéngt méi gerecht. Si mussen trotz gratis Kannerbetreiung awer ganzdags schaffen fir iwwert d’Ronnen ze kommen, an d’Kanner gesinn hir Elteren dee Moment dee ganzen Dag net. An deem Sënn déngt déi Form vu ‘sozialer Gerechtegkeet’ opmannst net de sozial Schwaachen… Et bleiwt en trauregen Fait, dass si sech dei Zäit mat de Kanner net kenne leeschten…

En fin de compte, leiden vill Elteren a Kanner ënnert der alldeeglecher Trennung. Dat ass eng Tatsaach! An dat stommt Leiden vun esou engem groussen Deel vun eiser Gesellschaft geet weider… Oder?

Sarah Bock

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *