Den Eescht vum Liewen…

Elo wou d’Schoul nees ugaangen ass, war oft, den Titel an den Zeitungen, dass fir vill Kanner, « Den Eescht vum Liewen«  ugangen ass.

Wat heescht dat, den Eescht vum Liewen? Mat Zäiten an der Schoul sinn, net bei den Elteren sinn, mä bei friemen Leit, mat denen de Kontakt gutt ass oder och net. An dann, roueg sëtzen bleiwen, brav nolauschteren, keng Dommheeten maachen, schaffen an sech konzentréieren, asw.

Beim « Eescht vum Liewen«  schwätze mer jo normalerweis vu schoulpflichtege Kanner, vu 4 Joer un.

Mä, wann ee kuckt, wéi dës Familljepolitik sech duerchgesat huet, wësse mer elo, dass et och ëmmer méi kleng Kanner betrëfft, suguer Puppelcher, déi schonn esou fréi hir Elteren net vill gesinn. Schonn a ganz klenge Joeren ëmmer an engem Groupe, am Kaméidi, scho ganz kleng, matmaachen wat elo um Programm steet. Schonn dann: den Eescht vum Liewen!

« D’Crèchen, als Viirstuf vun der ëffentlecher Schoul…« , sou sot et den Educatiounsminister, an der Emissioun « Background am Gespréich, vum 13. Mee, iwwer di « Méisproocheg Erzéiung vun de Sproochen a Crèchen an am Précoce« .

Also, Schoul, an nach ëmmer Schoul? Wou bleift dann dat frëscht, dat spontant, dat freedegt Lachen, wat mer dach bei de Kanner esou gären hunn.

Natierlech ass och d’Crèche eng Beräicherung fir Kanner, mä net all Kand ass duerfir gemaach, stonnelang, an engem Groupe, stonnelang, fort vun doheem sinn a seng Elteren wéineg ze gesinn. Kanner, déi nach ganz unhänglech sinn, Kanner, déi e bësschen méi lues oder méi schwaach sinn, ginn mat där ganzer Fréifërderung an Friembetreiung ënner. Et ass eng Saach vun Dosage…

Wann d’Elteren hire klenge Kanner, emol fir d’alleréischt di zolitt Bindung, an di wäertvoll Zäit wëlle schenken, déi e Kand sou néideg brauch fir sech gesond z’entwécklen, dann ass et dach un enger Regierung, och déi Elteren z’ennerstëtzen. Et gëtt eng Zäit fir alles, an d’Kandheet soll eng onbeschwéiert, eng fräi Zäit sinn. Eng Zäit wou d’Kand sech soll kënnen no sengem eegenen Rhythmus developpéieren, no senger eenzegaarteger Individualitéit.

Wann d’Elteren de Choix hätten, an d’Elteren selwecht ënnerstëtzt géifen ginn, da wären manner Kanner beieneen an de Crèchen, an d’Educatricen hätten méi Zäit, sech ëm all Kand ze këmmeren – well et ass jo dat, wat all Kand brauch.

Enorm Suen kaschten Friembetreiung, méisproochlech Fréierzéiung, eist Land. A mir wëssen iwwerhaapt net, wat et wierklech de Kanner, spéiderhin, bréngt. Wéi hätt en Deel vun dem Budget kinnten agesat ginn, fir den Elteren ënner d’Ärm ze gräifen, dass si sech kinnten selwer ëm hir Kanner këmmeren, wann si dat wëllen, kuerz gesot, den Elteren, de Choix loossen.

Oder, wann méi mi-temps, oder temps partiel géifen ënnerstëtzt ginn, da kinnten d’Elteren sech andeelen ouni hire Beruff ganz falen ze loossen, wann se dee gären hunn. Oder nach eng Iddi, vun där well méi geschwat gëtt: firwat net Bedingungslost Grondakommes aféieren?

Komesch, jo, dramatesch, dass haut vill Elteren am Hannergronn musse bleiwen an an hirer wichtegster Aarbecht, weder Ënnerstëtzung nach Unerkennung kréien. Et gëtt hinnen net noglauschtert, wann se bei sech spieren, dass den « Eescht vum Liewen«  fir hiert Kand nach fréi genuch ugeet.

« All Kand ass eis gläich Wäert« hat d’Regierung am Ufank vun hirem Mandat betount. Schéi wär et, mä d’Realitéit ass awer anescht ëmgesat ginn…

Isabelle Schmit-Mines

18.09.2017

Liest och:

Die Kindheit ist unantastbar, mam Herbert Renz-Polster

Bedingungslost Grondakommes, eng Iwwerleeung vum Alexandra Karger

 

Agenda :

STEP: d’Couren ginn den 2. Oktober nees un

EDUCATION ALTERNATIVE ET DEMOCRATIQUE: Colloque: « Free to learn», les 6 et 7 octobre 2017

http://www.freetolearnluxembourg.eu/Free_to_learn/Welcome.html

FAMILYLAB: Vorbereitung auf die Elternschaft: d’Couren ginn den 10. Oktober un

Initiativ Bedingungslost Grondakommes Lëtzebuerg: Table ronde, 17.10.17

 

 

Famill.lu an Méi Elteren, manner Staat : dat selwecht Engagement fir d’Wuel vun de Kanner an d’Wuel vun den Elteren

Famill.lu: All Dag, Är Commentairen, all Méindes nei Artikelen

 Liens utiles :

Initiativ Liewensufank: www.liewensufank.lu

Association pour la vie naissante: http://www.vienaissante.lu/

FAPEL: http://www.fapel.lu/

(dës Lëscht kann gären completéiert ginn, sot eis Bescheed).

 

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

217 thoughts on “Den Eescht vum Liewen…

  • 14 novembre 2016 à 12 h 03 min
    Permalink

    Déi Fra schléit eng ganz flott Methode fiir, wéi d’Kanner méi motivéiert a méi effektiv léieren. Liest d’Buch, et ass derwäert!

    Répondre
  • 16 novembre 2016 à 11 h 29 min
    Permalink

    Ech fannen et einfach en Hohn, all Dag liest oder gesäit een nei Etuden, Berichter vun Fuerscher etc, …aaner Länner änneren hire Familljemodell, fir datt d’Kanner nëmmen kennen doheem betreit ginn. Waat mécht eis Regierung: komplett de Géigendeel, Kanner sollen, (oder mussen) geschwënn vun Friemen betreit ginn,…..fir datt Mamm a Papp schaffen. A firwat? Fir de Wuesstum vum Land ze finanzéieren. Um Bockel vun de Generatiounen déi no eis kommen. Wonnerbar!!! Dann brauche mer keng Kanner, wann mer se nit méi gesinn! Komme mer sou lues fir, weé beim Momo, all Freed, all Farwen, all Laachen vun eise Kanner solle mer nit méi matkréien. Alles gëtt gro?! Eist Ländchen fänkt un bizarre ze ginn!!! Wéi wär et dann wann eis Politiker bessi besser géingen matt de Suen haushalten, bessi manner verdingen, an wann jidderen bessi verzicht fir datt mer rëm glécklech Kanner hunn, déi doheem sinn? Oder si glécklech Kanner an Familljen näischt méi Wäert well se kee Profit bréngen? Aaremt Lëtzebuerg!?

    Répondre
  • 20 novembre 2016 à 17 h 32 min
    Permalink

    Sinn och bei menge Kanner heiheem bliwwen an, jo, muss een méi lues machen, mä dat war et mir Wäert. Et muss een net alles hunn, et soll een mat dem zefridden sinn, wat een huet, mä et dréit sech bei ganz ville Leit alles ëm Suen ….

    Répondre
  • 30 novembre 2016 à 13 h 49 min
    Permalink

    Si huelen de Kanner hir Kandheet ewech.

    Répondre
  • 6 décembre 2016 à 18 h 10 min
    Permalink

    Ech verfollegen Är Méi, bleift drun. Weiderhin vill Kraaft an hoffentlech Erfolleg wënschen ech iech.

    Répondre
  • 7 décembre 2016 à 11 h 43 min
    Permalink

    Ech fannen et ëmmer schlëmm, datt iergendeen aneren fir eis Kanner decidéiert. Firwat freet keen déi Butzen eng Kéier selwer? Wéi se sech fillen, wann se vun engem Friemen betreit gin, an och nach eng friem Sprooch mussen léieren. Et gëtt ëmmer fir eis Kanner decidéiert, an iwwert hire Kapp ewech, Decisiounen geholl, wou kee weess wéi se sech op d’Kanner auswierken!

    Répondre
  • 7 décembre 2016 à 15 h 31 min
    Permalink

    D’Lehrergewerkschaft warnt och virdrun, an der Spillschoul, virun « liichtfankegen Experimenter » an der Spillschoul, déi d’Kanner onnéideg duercherneen bréngen kënnten, an riskéieren Auswierkungen op deen spéideren Sproochenerwerb ze hunn. Lëtzebuergesch soll als gemeinsam Sprooch geléiert gin.

    Répondre
  • 13 décembre 2016 à 13 h 22 min
    Permalink

    « Gestörte Bindung beeinträchtigt auch leider das Erlernen der Sprache und damit später das Lesen und Schreiben » (aus dem Buch: « Kinder brauchen Mütter » vum Hanne K. Götze)

    Répondre
  • 13 décembre 2016 à 18 h 47 min
    Permalink

    Ech fannen et ganz schlëmm, wat haut vun eisen klengen Kanner verlangt gëtt. Si mussen schon kleng Erwuessener sinn an däerfen net méi Kand sinn an dat gëtt dann vun der Politik virdiktéiert an gutt geheescht. Ganz schrecklech sou eppes. Waart emol nach e puer Joer, dann gesitt Där wat Där dovunner hutt !

    Répondre
  • 20 décembre 2016 à 18 h 58 min
    Permalink

    Wënschen Iech, Isabelle, och schéin Feierdeeg, an Merci datt et Famill.lu an « Méi Elteren, manner Staat » gëtt. Eng Säit, extra fir Familjen, an wou een och nach verstaan gëtt. An wou een mateneen diskutéieren kann, an sech austauschen. Weider sou fir 2017! An all de Familjen, Mammen, Pappen an Kanner wonnerschéin Chrëschtdeeg!

    Répondre
  • 3 janvier 2017 à 12 h 15 min
    Permalink

    Wann een d’Buch liest, kann een sech effektiv d’Fro stellen, op mer net schonn um Wee sinn, deen d’DDR deemols ageschloen hat. Et schielt sech wierklech lues a lues eraus, dass dat um Kommen ass. Mat all de Konsequenzen. D’Politiker, di Responabel sollen dat Buch liesen fir sech e Bild ze maachen, wat op eis Gesellschaft duerkënnt wann dëse Wee vun der Friembetreiung esou konsequent duerchgefouert gëtt. Et ass weder schéin fir d’Kanner, nach fir d’Mammen, nach fir d’Pappen. An an e puer Joer gesi mer dann, wat aus Kanner ginn ass, déi dat Essentiellt, wat e Kand brauch, net kritt hunn.

    Répondre
  • 4 janvier 2017 à 12 h 53 min
    Permalink

    Dat Buch do, missten mer dann alleguer als Mammen, déi doheem sinn ënnerschreiwen. An et ganz offiziell, deene Leit iwwerreechen, déi eis « wonnerbar » Familljepolitik maachen!

    Répondre
  • 6 janvier 2017 à 16 h 56 min
    Permalink

    Ee Kand brauch ëmmer een doheem, och nach als Jugendlechen sinn si frou, wann een doheem ass, wan si aus der Schoul kommen, och si erzielen nach gär direkt no der Schoul wéi hieren Schouldag war, oder Erliefnisser mat hieren Kollegen. Ze mengen, et géif duer goen, een Kand no der Maison Relais just nach an d’Bett ze bréngen an den Weekend « High life » mat 100 Aktivitéiten ze hunn oder all materiell Saachen ze kaafen, dat stëmmt menger Erfahrung no nit. Dat gëtt och kengem Kand gerecht. Dat gesinn an héieren ech all Dag, dass vill Kanner mat hirer Situatioun nit zefridden sinn. Vill Kanner oder Jugendlecher, déi 2 schaffend Elterendeeler hunn, sinn onglécklech dass keen doheem ass, wann si aus der Schoul kommen an si den ganzen Dag eleng doheem sinn. Doriwwer sollten sech och mol vill Leit Gedanken man.

    Répondre
  • 23 janvier 2017 à 9 h 36 min
    Permalink

    Zu der Reforme vum Congé parental:
    D’Réforme vum Congé parental gesäit jo no baussen wierklech ganz flott aus. D’Flexibilitéit ass jo ganz sécher e Pluspunkt. Finanziell schéngt en jo och méi attraktiv ze sinn AWER AWER AWER nëmmen fir déi Mammen oder Pappen, déi virum Congé parental à plein-temps geschafft hunn!!! An dovunner schwätzt keen! Huet en dat Joer virdrun schon à temps-partiel geschafft, huet en net de vollen Montant zegutt (sou wéi et soss eben eng prime war wou jiddfereen d’Recht drop hat). Dat mécht, datt sech eng Partie Elteren also guer keen Congé parental méi kënnen leeschten!!!
    Main eegent Bespill wier: Virun méngem Congé hat ech e mi-temps geschafft. Während méngem Congé parental krut ech déi Prime vun 1.778,31€. Mat Prêt an allgemeng fixen Ausgaben war dat enk an während däer Zäit hunn mir als Famill schon op sou munches missten verzichten (wéi sou vill Familljen bei engem Congé parental). Duerno sinn ech mat engem mi-temps zeréck schaffe gaangen. Géif ech dann bei engem weideren Kand ërëm e Congé parental wëllen ufroen, géif ech net emol 1.200€ eraus kréien Dat géif definitif net duer goen!!! Also hätt ech do mol guer keen Choix méi an kéint do mol guer keen Congé parental méi ufroen! An ech hunn studéiert an un sech nach e soi-disant « gudde » Salaire mat engem mi-temps. An eng Mamm oder e Papp, déi à temps-partiel schaffen (als Choix oder och net als Choix!), déi kënnen sech dat jo schon guer net méi leeschten!!! Firwaat gëtt een « bestrooft » wann een à temps-partiel schafft? Firwat ass dem engen säin Congé parental 3.200€ wäert an engem aneren säin 1.900€ (wann en virdrun plein-temps geschafft huet)? Dës Reforme ass sozial NET gerecht. Traureg, an erschreckend zugläich…

    Répondre
  • 24 janvier 2017 à 11 h 10 min
    Permalink

    Ass et dat, wat en se eng Kéier soten: Däitlech méi!? Abee jo! Mir ginn schéin bei d’Lisette gelooss. An d’Leit, dobaussen, déi net matrechnen, mengen wierklech, et wär däitlch méi. Eng schéin Regierung ass dat. Si kënnen sech net virstellen, wéi et bei de Leit ausgesäit, wat se brauchen. Et geet hinnen net ëm d’Wuel vun de Bierger. Et gëtt Zäit, dass d’Wahlen kommen.

    Répondre
  • 4 février 2017 à 18 h 29 min
    Permalink

    42 Joer wor ech « Spillschoulsjoffer », a gär.
    Dëst Joer, well d’Kanner mir gefeelt hunn, hunn ech ugefang, e bësschen während menger Pensioun ersetzen ze goen. Wat ech elo do erliewen, ass grausam.
    Kee Wonner, dass de Niveau vun eise Kanner erofgeet, si sinn esou verwëldert an opgedréint, dass si iwwerhapt net méi fäheg sinn, iergendeppes nozelauschteren. Eis Klassen ginn ëmmer méi grouss, an eis Kanner bräichten bal eng, 1 zu 1 Betreiung, well se déi jo soss néierens méi hunn.
    Déi jonk Schoulmeeschteren a Léierinnen sinn oft mat de Nerven um Enn.
    Leider sinn si an hirer Ausbildung net geléiert ginn, onnéidegen Stress ze vermeiden, an si hu keng Kanner méi do sëtzen, déi lernfäheg sinn.
    Duerfir vertrieden ech och d’Meenung, dass wann déi jonk Elteren méi dozou encouragéiert géifen ginn, hir Kanner bis op d’manst 3 Joer doheem ze versuergen, an duerno lues a lues, zäitweis an de Précoce ze bréngen, an dann ab 9 Auer, a net schonn um 8, da wier eis alleguer gehollef.

    Répondre
  • 9 février 2017 à 17 h 10 min
    Permalink

    D’Mammen solle wëssen, dass se staark sinn an d’Recht hunn, op hiert Häerz an Intuitioun ze lauschteren!

    Répondre
  • 8 mars 2017 à 13 h 08 min
    Permalink

    Gordon Neufeld: « …haltet an euren Kindern fest, nehmt den angemessenen Platz in ihrem Leben ein! Eltern bleiben die beste Antwort auf den Beziehungsbedarf der Kinder. »

    Répondre
  • 9 mars 2017 à 16 h 16 min
    Permalink

    Steve Jobs: “Diejenigen, die verrückt genug sind zu denken, sie könnten die Welt verändern, tun es auch.”

    Répondre
  • 29 mars 2017 à 14 h 20 min
    Permalink

    Ech verfollegen di ganz Entwécklung mat äusserst groussem Bedenken !! Ech gesinn Stress bei de Kanner, Stress an Iwwerbelaaschtung bei den Elteren, schlecht Gefill bei den Educatricen.
    Ech werfen just zwee Punkten an d’Ronn:
    Ass et normal, dass 2jähreg Kanner, Moies um 7 Auer schlofend um Arm vun der Mamm an d’Crèche kommen mussen ?
    Ass et normal, dass Mammen beim Personal kräischen a vu Stress, Iwwerfuerderung, a schlecht Gewëssen schwätzen ?
    Anscheinend fannen eis Regierung, eis Politiker dat ganz normal…
    Stellt Iech selwer d’Fro a gitt Iech selwer d’Äntwert…
    Merci

    Répondre
  • 2 mai 2017 à 14 h 07 min
    Permalink

    Virun allem mussen och Patronen matschaffen an do läit oft dee gréissten Problem wann e Kand krank ass. Ass et krank, basta, do gëtt et näischt ze diskutéieren, do muss wéinstens een vun den Elteren kënnen goen, wann d’Schoul urifft oder Schicht muss wiesselen oder Vakanzen sinn, an een muss Congé hunn etc. Ech kéint elo nach eng laaaaaaaang Lëscht maachen vun all de Problemer, déi Elteren hunn wann se zu zwee schaffen ginn an am schlëmmsten, trëfft et, elengerzéiend Mammen. Et ass net nëmmen de Bildungssystem oder Betreiuungsstruktur wou Problemer sinn, mä eis ganz Gesellschaft! Ech soen nach ëmmer, fir all déi Mammen, déi trotz Kanner hiren Beruff kënnen halen, all Respekt, mä ech soen awer och, dass net all Mamm oder Kand dee Wee packt an do muss gehollef ginn, an eng Léisung wier, a Form vun enger Mammerent, egal wéi, et muss enger Mamm och kënnen fräistoen, selwer ze entscheeden ob si eng Zäit beim Kand wëll bleiwen, mä duerch dat Finanziellt gezwongen ass, weider ze schaffen, an dat kann et net sinn! Net all Kand gëtt mat der Situatioun eens, ech schwätzen do aus Erfahrung, an e klengt Kand, dat permanent traureg an depressiv eriwwer kënnt kann net gesond fir de Butz sinn!

    Répondre
  • 16 mai 2017 à 11 h 03 min
    Permalink

    Ech sinn ëmmer ërëm erstaunt, wann ech gesinn, wéi et deem Kand elo geet, deem ech Nohëllefstonne ginn. Zënter, dass seng Mamm sech méi vun hirer Aarbecht konnt fräi maachen, ënnerhëllt se vill méi mat him, huet méi Zäit fir hien. An hien ass esou vill méi zefridden, wissbegiereg, fläisseg. Et ass en Ënnerscheed vun Dag a Nuecht, vis-à-vis vun där Zäit virdrun. Di regelmässeg Presenz vun den Elteren ass enorm wichteg, och wann d’Kanner méi grouss sinn.

    Répondre
  • 31 mai 2017 à 19 h 27 min
    Permalink

    Ech schaffen an enger Maison relais. Ech fannen et schlecht wann Kanner esou kleng nach eng Sprooch musse léieren, et wier vill méi gescheit, datt si emol richteg lëtzebuergesch léieren. Mir brauchen eng Eenheetssprooch. D’Kanner schwätzen schlecht lëtzebuergesch. Suguer ons Lëtzebuerger Kanner machen vill grammatesch Feeler. Kanner sollen Kanner sinn. Grouss sinn se nach laang genuch. Si sollen sech kënnen an enger gemeinsamer Sprooch verstännegen kënnen. Duerno hunn si nach genuch Zäit franséich ze léieren. Et ass och net fair vis-à-vis vun aneren Nationalitéiten.

    Répondre
  • 6 juin 2017 à 15 h 02 min
    Permalink

    Suguer kleng Kanner lauschteren méi no wéi gewëssen Leit aus dem Educatiounsministère. « Etuden hu gewisen »…..
    Weisen dann Etuden och, wéi Spätfolgen sinn vun – Iwwerfuerderung
    Iwwerbelaaschtung, Burn-out bei de Kanner?
    Majo nee: Et gëtt iwwer hire Kapp decidéiert , si ginn ouni hire Wëllen an eng Schinn gedréckt an den Elteren gëtt eppes opgezwongen, schéingeschwaat .
    Mä, entschëllegt ! Kand sinn – Kand bleiwen … Wou sinn d’Rechter vum Kand?
    Ah jooo … Et sinn jo Etuden gemaach ginn!

    Répondre
  • 13 juin 2017 à 11 h 38 min
    Permalink

    Hei an Italien hunn ech eng jonk Koppel bewonnert, déi en total handikapéiert Meedchen hunn.
    Hatt ass un de Rollstull gefesselt an huet eng Sonde fir erniert ze ginn.
    Mä et versteet villes a seng Elteren këmmeren sech rührend an mat immenser Léift ëm et, an huelen et iwerall matt.

    Et gëtt an eisem Hotel och eng Grupp handikapéiert a mongoloïd Leit. Si sin ganz glécklech an amuséieren sech köstlech am Mier.
    Dat ass genau den Contraire vun dem wat eis Gesellschaft eis haut wëllt gleewen don, nämlech dat esou en Liewen nët liewenswärt wier !!

    Répondre
  • 27 juin 2017 à 11 h 32 min
    Permalink

    Den Gilbert Pregno hat schonn am November 2014 op RTL gesoot: « Ech hun Problemer mat deem Ausmooss, déi d’Friembetreiung kritt. D’Elteren sinn fir d’Kanner ganz wichteg. Ech fäerten, dass mer an enger Gesellschaft sinn, wou ëmmer manner no de Bedürfnisser vun de Kanner gekuckt gëtt ».

    Répondre
  • 24 août 2017 à 11 h 01 min
    Permalink

    Frauen neigen zum Kümmern. Oder sagen wir besser: zum Bemuttern.
    Das ist kein Minus auf der menschlichen Skala, sondern das grosse Plus in einer zunehmend beziehungsarmen Gesellschaft.
    (Birgit Kelle, « Muttertier »)

    Répondre
  • 14 septembre 2017 à 17 h 19 min
    Permalink

    « Das Leben beginnt vor der Geburt », hat ech am däitschen « Baiabong », « Lesebuch für das 5. Schuljahr », aus dem Joer 1998, gelies. Ech hunn d’Buch erëmfonnt, wéi ech de Mëtteg geraumt hat. Jo, déi Zäit kruten d’Kanner nach de Respekt virum Liewen matgedeelt an konnten och nach d’Wonner doranner gesinn.

    Répondre
  • 19 septembre 2017 à 12 h 22 min
    Permalink

    « Es ist einfacher, starke Kinder zu bilden, als gebrochene Erwachsene zu reparieren » (F. Douglass). Wéi einfach kinnt et sinn!

    Répondre